‘जहाँ नहीं चैना, वहा नहीं रहना’ असे सूचक विधान भुजबळांनी केले आहे. त्यामुळे राजकीय चर्चांना उधाण आलं आहे. यासोबतच छगन भुजबळांनी आणखी एक मोठा गौप्यस्फोट केला आहे.
नागपूर : महायुतीच्या नव्या मंत्रिमंडळात स्थान न मिळाल्याने राष्ट्रवादीचे ज्येष्ठ नेते छगन भुजबळ नाराज झाले आहेत. त्यांनी आज माध्यमांशी बोलताना मनातील सल बोलून दाखवली आहे. ‘जहाँ नहीं चैना, वहा नहीं रहना’ असे सूचक विधान त्यांनी केले. त्यामुळे राजकीय चर्चांना उधाण आलं आहे. यासोबतच छगन भुजबळांनी आणखी एक मोठा गौप्यस्फोट केला तो म्हणजे, ‘मी राजीनामा दिल्यानंतरही आमदार माझ्याविरुद्ध बोलले’ तसेच ‘अजित पवार जेव्हा बाहेर पडले, सर्व म्हणत आहेत तर ठीक आहे, मी राहीन तुमच्यासोबत, असं म्हणालो. पण मी त्यांच्याबरोबर राहून पुन्हा सर्वांचे वार मीच झेलले,’ असे विधानही भुजबळांनी केले.
‘मंत्रिपदाची पर्वा नाही’
टीव्ही 9शी संवाद साधताना छगन भुजबळ म्हणाले, ओबीसींचा लढा उभारला होता. बीडमध्ये आमदारांची घरे पेटवली गेली होती, अनेकांची मालमत्ता जाळल्या गेल्या, त्यावेळी कुणीच बोलत नव्हतं. बीडमध्ये कुणी जायलाही मागेना आणि निषेध व्यक्त करायलाही मागेना, त्यावेळी मी तेथे गेलो. जे पाहिलं ते भयान होतं. कुणीची काही करु शकत नव्हतं आणि अख्खं बीड पेटलेलं होतं. मी भूमिका घेतली की, आता गप्प बसणार नाही. मी माझा आवाज उठवणारच आणि मागच्या वर्षी १६ नोव्हेंबरला मी राजीनामा दिला. पुढे अंबडला ओबीसी एल्गारच्या रॅलीसाठी रवाना झालो. तेव्हाच मी ठरवलं की मला मंत्रिपदाची पर्वा नाही.’ तर छगन भुजबळांनी पुढे ‘मागासवर्गीयांचे प्रश्न असतील आणि ते मी सोडवू शकत नसेल तर मग मंत्रिपदावर राहून काय करायचं?’ असेही नमूद केले आहे.
‘राजीनामा दिल्यानंतरही अडीच महिन्यांपर्यंत त्रास’
छगन भुजबळांनी पुढे आपल्या राजीनाम्याच्या वेळची स्थिती सांगत मोठा गौप्यस्फोट केला आहे. ते म्हणाले, ‘अंबडला जात असताना मुख्यमंत्री आणि उपमुख्यमंत्र्यांचे मला फोन आले, तुम्हाला जे काही बोलायचं आहे ते बोला, पण राजीनाम्याच्याबाबत काही बोलू नका. मी पण त्याबाबत काहीच बोललो नाही. परंतु मला राजीनामा दिल्यानंतरही अडीच महिन्यांपर्यंत सर्वजण हेच बोलत होते की, राजीनामा देऊन का नाही बोलत?’ तर पुढे भुजबळांनी आमदारांबाबत मोठे विधान केले. ‘विधानसभेत सुद्धा बोलत असताना मी एकटा बोलत होतो, सुप्रीम कोर्टाचे सर्व कागदपत्रे घेऊन मी माझा मुद्दा मांडत होतो. त्यावेळेला मागून आणि पुढून दोन्ही बाजूने माझ्या राजीनाम्याची मागणी झाली, पण मी गप्प बसलो. नंतर मात्र एका विशिष्ट प्रसंगी अती झालं आणि जे आमदार माझ्याविरुद्ध बोलले, त्यावेळेला मी म्हणालो, आता राजीनामा दिला आहे,’ असे छगन भुजबळ म्हणाले.
