नाना पाटोले : काँग्रेसचे शहर उपाध्यक्ष रमण पैगवार यांनी पत्रकार परिषद घेत पटोले हेच काँग्रेसच्या पराभवासाठी कारणीभूत असल्याचे सांगितले.
नागपूर : विधानसभा निवडणुकीतील पराभवानंतर काँग्रेस प्रदेशाध्यक्ष पदावरून नाना पटोले यांना हटवण्यात यावे, अशी मागणी पक्षाच्या विविध स्तरांवरून जोर धरू लागली आहे. पटोले यांच्यामुळेच पक्षाला दारुण पराभवाला तोंड द्यावे लागले, त्यामुळे त्यांना तत्काळ हटवून त्यांच्याऐवजी पश्चिम नागपूरचे आमदार विकास ठाकरे यांची प्रदेशाध्यक्षपदी नियुक्ती करावी, अशी मागणी नागपूर शहर काँग्रेस कमिटीने केली आहे. यासंदर्भात काँग्रेसचे शहर उपाध्यक्ष रमण पैगवार यांनी पत्रकार परिषद घेत पटोले हेच काँग्रेसच्या पराभवासाठी कारणीभूत असल्याचे सांगितले.
‘नागपूर शहरात सहा विधानसभा मतदारसंघापैकी केवळ दोन जागांवर पक्षाला विजय मिळवता आला. तर उर्वरित चार ठिकाणी पक्षाच्या उमेदवारांचा पराभव झाला. शहरात काँग्रेसच्या नेत्यांनी पक्षाचा त्याग केला. मात्र, त्यावर पटोले यांच्याकडून काहीच करण्यात आले नाही. पक्षात सोशल इंजिनीअरिंगचा अभाव होता, उमेदवारी देताना याचा काहीच विचार करण्यात आला नाही. कार्यकर्त्यांना विश्वासात घेण्यात आले नाही. यासाठी पटोले हेच जबाबदार होते. त्यामुळेच पक्षाला पराभवाला तोंड द्यावे लागले, असा आरोप पैगवार व इतर पदाधिकाऱ्यांनी केला.
विधानसभेनंतर आता आगामी काळात महापालिकेच्या निवडणुका आहेत. असे असताना पक्षात संघटनात्मक बदलांची मागणी जोर धरत आहे. विकास ठाकरे यांचा संघटनात्मक अनुभव बघता आणि नुकत्याच झालेल्या लोकसभा निवडणुकीत केंद्रीय मंत्री नितीन गडकरींना चुरशीची लढत देत स्वतःची नेतृत्वक्षमता सिद्ध केली आहे. त्यामुळे आता त्यांनी राज्य पातळीवर पक्षाचे नेतृत्व करावे, अशी पक्षातील नेत्यांची व कार्यकर्त्यांची इच्छा आहे.
विधानसभेनंतर आता आगामी काळात महापालिकेच्या निवडणुका आहेत. असे असताना पक्षात संघटनात्मक बदलांची मागणी जोर धरत आहे. विकास ठाकरे यांचा संघटनात्मक अनुभव बघता आणि नुकत्याच झालेल्या लोकसभा निवडणुकीत केंद्रीय मंत्री नितीन गडकरींना चुरशीची लढत देत स्वतःची नेतृत्वक्षमता सिद्ध केली आहे. त्यामुळे आता त्यांनी राज्य पातळीवर पक्षाचे नेतृत्व करावे, अशी पक्षातील नेत्यांची व कार्यकर्त्यांची इच्छा आहे.
तसेच आगामी निवडणुका बघता पक्षाने बुथ स्तरावर पक्षाला कसे मजबूत करता येईल हे वाड्या-मोहल्ल्यांमधील बघावे, समस्या सोडवण्यासाठी प्रयत्न करावेत, आंदोलन उभारावीत, काँग्रेसच्या विचारधारेचा प्रचार व प्रसार करण्यावर भर द्यावा, पक्षातील वरिष्ठ नेत्यांनीही यात सहभागी व्हावे, कार्यकत्यांशी थेट संवाद साधण्याचे व्यासपीठ उपलब्ध करून द्यावे, जेणेकरून पक्षाला व कार्यकर्त्यांना पुन्हा एकदा उभारी मिळेल, अशा अपेक्षाही पैगवार यांनी यावेळी व्यक्त केल्या. पत्रकार परिषदेला रवी गाडगे, डॉ. प्रमोद चिंचखेडे, मोईन काजी, पिंटू बागडी, पुरुषोत्तम गौरकर, राजन तिघरे, महेश श्रीवास आदी उपस्थित होते.
