भुजबळ यांना फडणवीसांच्या मंत्रिमंडळात स्थान देण्यात आलेलं नाही. त्यामुळे भुजबळ नाराज आहेत. त्यांची नाराजी दूर करण्यासाठी पक्षाने त्यांना राज्यसभेवर जाण्याची ऑफर दिली आहे.
नागपूर: महायुतीचा मंत्रिमंडळ विस्तार झाला असून नागपुरात महायुतीच्या ३९ आमदारांनी मंत्रिपदाची शपथ घेतली. मात्र, यावेळी राष्ट्रवादी अजित पवार गटाचे वरिष्ठ नेते छगन भुजबळ यांना मंत्रिपद देण्यात आलेलं नाही. त्यावर छगन भुजबळ यांनी उघडपणे नाराजी व्यक्त केली आहे. इतकंच नाही तर त्यांची मनधरणी करण्यासाठी राष्ट्रवादीने त्यांना राज्यसभेची ऑफरही दिली. पण, भुजबळांनी ती ऑफर नाकारल्याचती माहिती आहे.
याबाबत पत्रकारांशी बोलताना छगन भुजबळ म्हणाले की, “सात आठ दिवसांपूर्वी म्हटलं की राज्यसभेवर जा, मला राज्यसभेवर जायचं होतं पण कधी ते पूर्वी साताऱ्याला जी जागा दिली होती तेव्हा, त्यावेळी त्यांनी ती दिली नाही. तेव्हा सांगितलं की तुम्ही लढायला हवं, तुम्ही लढलात तर पक्षाला अधिक पाठबळ मिळेल. मी ठीक आहे म्हटलं आणि लढलो, निवडून आलो”.
“मी त्यांना सांगितलं की मी ताबडतोड जाऊ शकत नाही. तो माझ्या मतदारांसोबत विश्वासघात ठरेल. कारण, राज्यसभेवर जायचं तर विधानसभेचा राजीनामा द्यावा लागेल, ते माझ्या लोकांसाठी दु:खदायक ठरेल. ज्यांनी मला प्रेम दिलं त्या मतदारसंघात मी असं वागणार नाही”, असं भुजबळ म्हणाले. तसेच, जेव्हा पत्रकारांनी त्यांना विचारलं की तुम्ही ही राज्यसभेची ऑफर स्वीकारणार नाही का, त्यावर त्यांनी हातवारे करत नाही असा सूचक इशारा दिला.
होय मी नाराज – छगन भुजबळांचे वक्तव्य..
मी सामान्य कार्यकर्ता आहे, मला डावललं काय, नी फेकलं काय. काय फरक पडतो, अशी प्रतिक्रिया व्यक्त करत छगन भुजबळ यांनी नाराज असल्याचे सांगितले. तसेच, मला का डावललं हा प्रश्न तुम्ही ज्यांनी डावललं त्यांना विचारायला हवा, असंही भुजबळ म्हणाले होत.
तुम्ही अजित पवारांशी बोलला नाही का? यावर उत्तर देताना भुजबळ म्हणाले की, मी बोललो नाही, मला त्याची गरज वाटत नाही. मंत्रिपदं आली गेली, हा भुजबळ संपला नाही. लाडकी बहीण आणि ओबीसी यांनीच महायुतीला हा विजय मिळवून दिला. पुढे काय करायचे ते कार्यकर्त्यांशी चर्चा करून ठरवू असे भुजबळ म्हणाले.
पत्रकार: शरद पवारांना भेटणार का? या प्रश्नावर भुजबळ म्हणाले की, अताच १२ डिसेंबरला त्यांच्याशी भेट झाली आहे. भुजबळांना मंत्रिपद न मिळाल्याने नाशिकमध्ये कार्यकर्ते नाराजी व्यक्त करत आहेत.
