आता राज्य सरकारने या मागणीची दखल घेत १ जानेवारी ते २० डिसेंबर २०२४ या दरम्यान पदभरतीसाठी नव्याने प्रसिद्ध झालेल्या आणि निवड प्रक्रियेचा कोणताही टप्पा पार न पडलेल्या जाहिरातींसाठी अर्ज केलेल्या उमेदवारांना दिलासा दिला आहे. अशा उमेदवारांच्या कमाल वयोमर्यादेत शिथिलता देण्यात आली आहे. राज्य शासनाच्या निर्णयानंतर महाराष्ट्र लोकसेवा आयोगाने आज (सोमवार, २३ डिसेंबर) नोटिफिकेशन काढले आहे.
राज्य लोकसेवा आयोगाच्या (एमपीएससी) विविध पदांच्या जाहिरातींमध्ये बदल करण्यासाठी आयोगाला लागलेल्या विलंबामुळे वयोमर्यादा ओलांडली गेल्याने अपात्र ठरलेल्या लाखो उमेदवारांना आयोगाने दिलासा दिला आहे. राज्य सरकारने एमपीएससीच्या विविध पदांच्या भरतीसाठीच्या कमाल वयोमर्यादेत एका वर्षाने वाढ करण्याचा निर्णय घेतला आहे. १ जानेवारी ते २० डिसेंबर २०२४ या कालावधीत पदभरतीसाठी नव्याने प्रसिद्ध केलेल्या जाहिरातींसाठी अर्ज केलेल्या उमेदवारांनाच या वयोमर्यादावाढीचा लाभ मिळणार आहे. आयोगाकडून गट-ब आणि गट-क या दोन्ही परीक्षांच्या तारखा बदलण्यात आल्या आहेत. गट- ब ची परीक्षा ५ जानेवारीला होणार होती.
एमपीएससीतर्फे राज्य सरकारच्या विविध विभागांमधील वेगवेगळ्या स्तरांवरील पदे भरली जातात. काही महिन्यांपूर्वी राज्य सरकारने मराठा समाजातील सामाजिक आणि शैक्षणिकदृष्ट्या मागास वर्गासाठी १० टक्के आरक्षण लागू करण्याचा निर्णय घेतला होता. मात्र, तोपर्यंत विविध पदांसाठी काढलेल्या जाहिरातींमध्ये तसा उल्लेख नसल्याने या जाहिराती मागे घेण्यात आल्या. या पदांच्या भरतीसाठी जाहिरातींमध्ये बदल करून मराठा आरक्षणाचा समावेश करण्याचे आदेश दिले होते.
परीक्षेच्या नवीन तारखा-
महाराष्ट्र्र गट ब अराजपत्रित सेवा पूर्व परीक्षा २०२४ व महाराष्ट्र्र गट क सेवा पूर्व परीक्षा २०२४ या दोन्ही पेपरच्या वयोमर्यादेत शिथिलता व परीक्षेच्या सुधारित दिनांकाबाबतचे शुध्दीपत्रक आयोगाच्या संकेतस्थळावर प्रसिध्द करण्यात आले आहे.
वयाधिक उमेदवारांनी अर्ज करण्याचा अंतिम दिनांक :- ६ जानेवारी २०२५
जा.क्र.०४८/२०२४ महाराष्ट्र गट ब अराजपत्रित सेवा पूर्व परीक्षा २०२४ :- २ फेब्रुवारी २०२५.
जा.क्र.०४९/२०२४ महाराष्ट्र गट क सेवा पूर्व परीक्षा २०२४:- ४ मे २०२५.
नवीन परिपत्रकाची लिंक: blob:https://mpsc.gov.in/cc4ee918-0a12-426a-9481-d73ad55e5f11
